أكبر 10 شركات سوشيال ميديا في العالم وأهم حملاتهم

إيه هي أهم شركات السوشيال ميديا Social Media Agencies على مستوى العالم؟، وإيه أهم البراندات اللي بتدير شغلها، وكمان أنجح حمالاتها، ده اللي هانعرفه مع بعض بدايةً من النهاردة:

العاشرة

الإسم: Ignite Social Media

تاريخ الإنشاء: 2007

البلد: برمنجهام

عدد الموظفين: 88

أهم البراندات اللي بتدير شغلها: Microsoft, Windows, Jeep, Fiat

التاسعة

الإسم: 1000 Heads

تاريخ الإنشاء: 2000

البلد: لندن

عدد الموظفين: 90+

أهم البراندات اللي بتدير شغلها: Sony, Samsung, Talksport, Vodafone, Teradata

الثامنة

الإسم: Mullen

تاريخ الإنشاء: 1970

البلد: امريكا

عدد الموظفين: 500+

أهم البراندات اللي بتدير شغلها: Zappos, Barnes & Noble, National Geographic

السابعة

الإسم: Headshift

تاريخ الإنشاء: 2002

البلد: لندن

عدد الموظفين: 40+

أهم البراندات اللي بتدير شغلها: Sky Arts, British Airwaves, Compass

السادسة

الإسم: Izea

تاريخ الإنشاء: 2008

البلد: امريكا

عدد الموظفين: 46

أهم البراندات اللي بتدير شغلها: Saatchi & Saatchi, GM, Mastercard, American Express, Google

الخامسة

الإسم: Salesforce

تاريخ الإنشاء: 1999

البلد: امريكا

عدد الموظفين: 8,500

أهم البراندات اللي بتدير شغلها: L’oreal, HP, UNFPA, Virgin Mobile, Playboy

الرابعة

الإسم: LiveWorld

تاريخ الإنشاء: 1984

البلد: امريكا

عدد الموظفين: +50

أهم البراندات اللي بتدير شغلها: Dove, Flipboard, MSN, AT&T, Disney, HBO

الثالثة

الإسم: Altimeter Group

تاريخ الإنشاء: 2008

البلد: امريكا

عدد الموظفين: 23

أهم البراندات اللي بتدير شغلها: Ford Motor, eBay, Toyota, Royal Dutch Shell

الثانية

الإسم: e-Dologic

تاريخ الإنشاء:  1999

البلد: اسرائيل

عدد الموظفين: +30

أهم البراندات اللي بتدير شغلها: Coca-Cola Zero, Orange, Actimel

الاولى

الإسم: We Are Social

تاريخ الإنشاء: 2008

البلد: لندن

عدد الموظفين: 270

أهم البراندات اللي بتدير شغلها: Sky, ESPN, The Guardian, Intel, Adidas

خلصت حلقة النهاردة، وفي المقالات الجاية هامسك كل شركة وأتكلم عن أنجح حمالاتهم.

ازاي تلاقى جمهورك علي Instgram

الخطوة الأولى – تابع الهاشتاج اللي عامل حدث:

مهما كان مجال الاكونت اللي انت شغال عليه اكيد هتلاقي حاجات متصلة ليها زي المؤتمرات، الاحتفالات، الندوات او الاعلانات ومهما كانت الاحداث الخاصة بيك حاول دايما تلاقي هشتاج الحدث الاعلى و المتابعه عليه

بالنسبالي مثلا: الجمهور المستهدف هو الناس المهتمة بمجال السوشيال ميديا واصحاب شركات الديجتال ماركتنج، فانا بتابع  مؤتمرات السوشيال ميديا دايما وبشكل مستمر وهتابع الهشتاج المنتشر بشكل كبير جدا وهو(#cmworld)

- لكن لازم تعمل اكتر من انك تتابع الهشتاج وبس لازم كمان تكون نشيط ودايم الابداع  ودايام خليك متفاعل مع الناس اللي مشاركة على الهشتاج زي مثلا انك تقدملهم معلومة مفيدة، حد سئل على حاجة حاول انك ترد عليه

* ومن خلال متابعتي مع هشتاج #CMWorld اليومين دول قدرت اوصل لـ20 فولو جديد

الخطوة الثانية – تابع الهاشتاج اللي بيتكلم عن الهوايات اللي لها علاقة بشغلك:

ودي فيها شبه كبير من الطريقة اللي فوق وهي انك تتابع الهاش المتعلقة بالهوايات او المصالح اللي لها علاقة بشغلك .. يعني إنت لو مثلا لو انت مجالك مهتم بمجال العربيات يبقى لازم تتابع الهاشتاج الخاص بموديلات العربيات وصيانة العربيات وهكذا

- لو إنت مهتم بالرياضة فانت هنا لازم تتابع الهاشتاج الخاص بمشاهير اللاعبين و انواع الرياضة المختلفة و الاندية وهكذا

* وابدأ دور على الفانز وتفاعل معاهم، اعملهم لايك.

الخطوة الثالثة – شوف المتابعين للمنافيسين ليك:

بما انك بتدور على جمهورك المستهدف على انستجرام وفي احتمالية انك تلاقيهم عند منافسينك فدا بيسهل عليك الموضوع بانه انت كدا سهل تلاقيهم في مكان واحد. كل اللي عليك تعمله هو انك تروح اكونت المنافس ليك وتدوس على الفولورز وتبدء بقى تعمل فولو للناس اللي انت شايف انها فعلا هتفيدك واعملهم لايك وكومنتات وكل حاجة

- الطريقة هتاخد منك وقت أكبر من النقطين اللي فوق لكن هي برده طريقة فعالة

* وخد بالك انه لو انت عندك مثلا اكتر من 6000 فولور وهم مش مهتمين بمجال البراند بتاعك فكدا الانستجرام ملوش لازمة بالنسبالك وقد اهميته

الموضوع لسه مانتهاش، لو إنت عندك نصيحة تانية فعالة تحب تشاركنا بيها ياريت تقولنا عليها في كومنت عشان نضيفها على المقال الأصلي.

المصدر 

http://www.e3langi.com/%D9%83%D9%8A%D9%81-%D8%AA%D8%AC%D8%AF-%D8%AC%D9%85%D9%87%D9%88%D8%B1%D9%83-%D8%B9%D9%84%D9%89-%D8%A5%D9%86%D8%B3%D8%AA%D8%AC%D8%B1%D8%A7%D9%85/

الكاتب 

أحمد عبد السلام 

النصائح الخمسة لأهم حاجة أنت محتاجها فى Linkedin

Linkedin Summary الـ هو الإنطباع الأول اللى ممكن تسيبه عند أصحاب العمل عشان يقدروا يتعرفوا عليك أكتر بعيدا عن مسمى وظيفتك وصورتك الشخصية.

 

 

إستخدم الخمس نصائح دى عشان تكتب Summary  فعال يخلى أصحاب العمل يتصلوا بيك فورا:

 

إوعى تسيب ال Summary  فاضى.

لأن ده معناه أن صفحتك هتبقى مجرد سيرة ذاتية من غير بيان ملخص عن نفسك أو مجرد موضوع من غير مقدمة. وساعتها أصحاب العمل أو المديرين مش هيقدروا يوصلوا للجزئية إللى المفروض يركزوا عليها في صفحتك مادام أنت مقدمتش إشارة ليها في ال Summary  .

 

 

إستخدم ال 2000 حرف كلهم.

لو ماستغلتش الفرصة بكتابة 2000 حرف عن نفسك يبقى بتفقد فرصة وجود كلمات رئيسية هتساعد في تحسين فرص البحث عنك. وبالرغم من أن أفضل أماكن للكلمات الرئيسية هي العنوان الرئيسى والتخصص والمسمى الوظيفى، لكن الكلمات الرئيسية في الsummary  بتتحسب بردو. املأ الSummary  بكلمات رئيسية تساعد مدير التوظيف أنه يبحث عنك ويلاقيك.

 

إحكى قصصك واتكلم عن إنجازاتك.

كل الناس بتحب الحكايات الجيدة وإذا قدرت تحصل على اهتمام القارىء بمعلومة عن نفسك هو مش هيقدر يتحصل عليها من سيرتك الذاتية، يبقى أنت كدة ماشى في الطريق السليم. متستناش لما مدير التوظيف ينزل للجزء المطلوب في السيرة الذاتية عشان يعرف إنجازاتك في العمل، ال Summary  هو فرصتك الأولى . متضيعهاش.

 

 

إكسر حدة ال Summary .

استخدم العناوين والعناوين الفرعية والجرافيك. لازم تفصل بين الكلام ومتتوقعش أن حد ممكن يقرأ كتلة كبيرة من الكلام من غير فواصل.

فكر في عناوين وشعارات جيدة تستخدمها. يعنى مثلا ممكن تكتب في العنوان:

مهندس معمارى | تصميمات خارج الصندوق     Architect| Out of Box Designs   

وتقدر تكتب في العناوين الفرعية الشىء اللى يساعدك على التسويق يعنى مثلا: "حائز على جائزة أحسن أداء أو أفضل فريق هندسى"

* وديه بعض أشكال الجرافيك (◙ ❖ ■ ★ ► ) إللى ممكن تستخدمها عشان تفصل العناوين بدل استخدام الأسطر الكبيرة (____) لأنها بتستهلك عدد من ال 2000 حرف.

– التنسيق ده هيسهل القراءة على الباحث ويوصله بسرعة للمعلومة المطلوبة.

 

ضيف معلومات الاتصال بيك.

إجعل الاتصال بيك سهلا. لو تقدر ضيف رقم تليفونك والايميل الشخصى. أو ضيف الايميل فقط وتقدر تعمل ايميل مخصوص لـ Linkedin  عشان تتجنب ال Spam .

 

وتقدر تكتب في الختام الآتى: 

Seeking a new job opportunity

Contact me: …….@yahoo.com

0111 XXXXXXXX

Or

Please contact me through this profile.

 

وأهم حاجة متنساش تراجع على الأخطاء الإملائية واللغوية.

المصدر
 http://www.e3langi.com/%D8%A7%D9%84%D8%B3%D9%8A%D8%B1%D8%A9-%D8%A7%D9%84%D8%B0%D8%A7%D8%AA%D9%8A%D8%A9-%D8%B9%D9%84%D9%89-%D9%84%D9%8A%D9%86%D9%83%D8%AF-%D8%A5%D9%86/

الكاتب أحمد عبد السلام

10 نصايح عشان تلاقي شغل علي لينكد إن

في دراسة اتعملت من فترة قالت إن 94% من الناس اللي بتدور على موظفين تشتغل عندهم في الشركة يستخدموا لينكد إن، وده بيوضح أهمية لينكد إن كمكان تلاقي من عليه شغل.
دي بقى شوية حاجات تخلى الأكاونت بتاعك كويس ويجيب ليك فرص شغل كويسة:
1- الصورة و التايتل:
لازم تخلى الصورة شخصية ليك واضحة، و تكون صورة رسمية لإن نسبة مشاهدة بروفايلك بتزيد حوالي 9 مرات، و لازم تحت إسمك تكتب التايتل بتاعك حالياً ويكون واضح.
2- نبذة مختصرة:
– إكتب في الـ Summary نبذة مُختصرة عنّك، إعتبرها كدا زي إتكلم عن نفسك في الانترفيو.
3- الخبرات:
إكتب في الخبرات كل حاجة إنت اشتغلت فيها في المجال بتاعك، إسم الشركة اية؟ المدة قد إية وهل خلاص سبتها ولا لسه مكمل فيها؟ إية الدور اللي كنت بتعمله في الجزء ده وقتها؟
4- التحديث:
دايماً إعمل تحديث للبروفايل بتاعك، وحط كل حاجة إنت أنجزتها سواء في شغلك أو كورس أخدته أو عمل تطوعي عملته.
5- الجروبات:
شارك في الجروبات المهتمة بمجال شغلك أو جروبات التوظيف.
6- حاجات تانية:
أاي كورسات أخدتها أو أي حاجات عملتها تطوعي قبل كدة ضيفها في الجزء الخاص بيها.
7- ال كونكشنز:
دي مهمة جداً، خد بالك إن عددهم مهم جداً في ظهورك في البحث، ويفضل إنهم يكونوا أكتر من 500، وركز دايماً إن أغلب الناس اللي عندك يكونوا من مجالك، وجزء فيه بتوع التوظيف في الشركات اللي بتشتغل في مجالك، والباقي عادي الغرض منهم تكبر بيهم دايرة معارفك.
8- المهارات:
حاول لما تيجي تتكلم عن المهارات بتاعتك إتكلم عن المهارات اللي إنت شايفها في نفسك.
9- الريكومندشن:
خللي دايماً زملائك أو مديرينك في الشغل أو أي حد إنت إشتغلت معاه أو درّسلك في كورس أو عمل تطوعي يعملّك ريكومندشن، دي هتفيدك إنه لما حد يدخل يبص على بروفايلك يلاقي ناس بتقول كلام كويس عنك وعن شغلك.
10- ركز في اللي هتكتبه:
ياريت تركز إن لينكد إن دا مكان بروفيشنال وبيمثل السي في بتاعتك أون لاين عشان تقدر تلاقي وظيفة، مش مكان بنكتب فيه بوستات عن حياتنا اليومية زي باقي السوشيال ميديا.

الكاتب: أحمد عبد السلام 
المصدر
http://www.feldigital.com/10-%D9%86%D8%B5%D8%A7%D9%8A%D8%AD-%D8%B9%D8%B4%D8%A7%D9%86-%D8%AA%D9%84%D8%A7%D9%82%D9%8A-%D8%B4%D8%BA%D9%84-%D8%B9%D9%84%D9%8A-%D9%84%D9%8A%D9%86%D9%83%D8%AF-%D8%A5%D9%86/

4 طرق تبهر بيها زمايلك في الشغل لو إنتا أصغر واحد فيهم

من المواقف الصعبة إنك تكون أصغر واحد في شغل وده بسبب الصعوبات اللي بتواجهها عشان تحصل علي الثقة و المصداقية في ظل القيود اللي بتبقي مثبتاك أكتر من زمايلك القدام في الشغل.
من أهم الحاجات اللي إنتا محتاج تعملها في المرحلة دي ببساطة إنك تصبر و تشتغل زي الأسد، في نفس الوقت في بعض الحاجات الملموسة اللي تقدر تعملها عشان تأثيرك يبان أسرع. في النقط اللي جاية هيبان أكتر إزاي تقدر تكتسب ثقة و إحترام زمايلك في الشغل عشان تبقي الواد الصغير الشاطر بتاع الشغل.
إتعلم الشغل
وإنتا صغير وجديد في شغل بيبقي في حاجات كتير عن المجال و الشغل متعرفهاش، الموضوع ده حله بسيط، كل ما تدور أكتر كل ما اللحظة اللي هتبهر فيها زمايلك القدام هتبقي أقرب.
أولاً، قضي شوية وقت كويسين في قراية ويب سايت الشغل، أكاونتات شغل علي السوشيال ميديا ولو في نيوز ليتر بيبعتوها، ده غير إنك محتاج تقضي شوية وقت تقرا في مواقع إنترنت متخصصه في نفس مجال شركتك، يفضل إنك تعمل الكلام ده قبل ما يومك يبدأ في الشغل وفي أول الأسبوع قبل ما تتشغل. إبني ترسانة أسلحتك المعلوماتية :)، مش بس هتلاقي نفسك بتعمل شغل أحسن و تبان جاهز أكتر هتبان كمان واثق في نفسك أكتر في الشغل و الإجتماعات.
ثانياً، لازم تبتدي تتواصل مع زمايلك في القسم اللي إنتا فيه بالذات اللي لسه سايبين مكانك مبقالهمش كتير عشان تستفيد من خبراتهم وعشان يقولولك لو في أي فرصة أو مشكلة تاخد بالك منها. إطلب منهم بشكل مباشر لو يحبو ينزلو بريك تتكلمو شوية وبالذات في الحبة بتوع الصبح بدري قبل ضغط الشغل، لما تبتدي تعمل كده هيبتدي يتاخد عنك صورة إنك ملتزم وعايز تشتغل وعايز تبقي حاجة.
خليك شخص يعتمد عليه
لما تبقي الشاب الصغير اللي في الشركة بيبقي مهم جداً تاخد بالك من الإنطباع الأول اللي هيتاخد عنك وتراعي إن الإنطباع ده يفضل مستمر لإنك هتفضل تتعرض لإختبارات مستمرة عشان يتأكدو دايماً من قدرتك علي تحمل التاسكات المختلفة.
نصيحتي ليك إنك لازم تبقي شخص يعتمد عليه لأقصي الحدود، ده بيشمل كل حاجة من أول حضورك الإجتماعات بدري مروراً بإنك تسلم شغلك في مواعيدك مظبوط بالإضافة إلي الإلتزام بوعودك بأي تمن، صدقني هتنبهر لما تشوف السرعة اللي رجليك بتثبت بيها في شغل، الإعتماد عليك كمان لازم يشمل حاجات زي مظهرك الشخصي وإلتزامك بمواعيد الشغل. سهلة؟ كل ما ثبات مستواك يزيد في كل حاجة في الشغل كل ما ثقة زمايلك القدام فيك هتبتدي تزيد.
لما تحصل غلطة شيلها
الدنيا هتبقا بمبي لو كلنا عارفين هنعمل إيه و نسلمه من غير أي مشاكل زي السكينة في الحلاوة. للأسف، المشاكل بتحصل لكل واحد خاصة لو إنتا لسة بتبتدي شغل، وللأسف ناس كتير في بدايات شغل مكانتش شايفة ده وحاولو يغطو علي غلطاتهم أو يعتذرو عنها بزيادة قوي.
بص يا سيدي، أول متلاقي نفسك قدام مشكلة في شغل إعمل كل اللي تقدر عليه عشان تحلها، لكن متخليش باقي الناس في غيبوبة عن الموضوع لإنهم كده كده هيعرفو إنك عملت مشكلة ولو المعرفة مجتش عن طريقك وجت عن طريق أي حاجة تانية زي إن المشكلة كبرت وخرجت عن السيطرة ومبقتش ينفع يتداري عليها فالموضوع ده هيأثر جداً علي مصداقيتك في الشركة وإعتمادية زمايلك عليك.
زمايلك في الشغل مبيبقوش بس عايزين يعرفو المشاكل اللي قابلتك قد ما بيبقو مهتمين بإنهم يعرفو إنتا هتحلها إزاي. لما تيجي توصل المشكلة لزميلك أو مديرك جمع كل المعلومات عن المشكلة بتفاصيلها ولازم يبقي معاك الحل اللي إنتا مقترحه للمشكلة، إعرض الكلام ده بشكل هادي ولازم تقول هتعمل إيه بعد كده عشان تتفادي إن المشكلة دي تحصل تاني.
خلص كمان حتة حتي لو إنتا خلصان ومفيش فيك نفس
كل ما ثبات مستواك في شغل بقا أكتر كل ما فرصتك في إكتساب الثقة زادت، عشان كده بدل ما تفضل دايماً بتعرض اللي عملته في الشغلانة اللي في إيدك حاول تتوقع الحاجة الجاية اللي هتتطلب منك و خش الميتينج و إنتا محضرها. إتكلم مع مديرينك و زمايلك القدام في الشغل عشان تحاول تعرف منهم معلومات عن الخطوة الجاية عشان تدخل عليها دايماً جاهز.
حرصك دايماً علي إنك تبقا سابق بخطوة بيبين قد إيه إنتا حريص علي الشغل و إيجابي، حتي لو الحاجة الزيادة صعبة أو جديدة عليك، دايماً لازم تبقي عايز تخش علي التاسك اللي بعده حتي لو متعرفش هوا فيه إيه حتي لو هوا مش في صميم شغلك، لازم تعرف معلومات عنه. مش لازم تبقي السوبر مان اللي عارف كل حاجة في الموضوع، لكن كونك الشخص اللي مبيقولش غير حاضر لأي تاسك بتتزق عليه الموهوب دايماً في إيجاد حلول للمشاكل أو في محاولة حل المشاكل هتفرق معاك جداً في السرعة اللي بتتحرك بيها في الشركة وفي المجال كله.
عندك حاجات بتعملها عشان تثبت نفسك في مجالك وفي شركتك؟ أو تفتكر حاجات عملتها زمان عشان تثبت رجليك في شركتك؟ إكتبهالنا في الكومنتات.

المصدر :
 http://www.feldigital.com/4-%D8%B7%D8%B1%D9%82-%D8%AA%D8%A8%D9%87%D8%B1-%D8%A8%D9%8A%D9%87%D8%A7-%D8%B2%D9%85%D8%A7%D9%8A%D9%84%D9%83-%D9%81%D9%8A-%D8%B4%D8%BA%D9%84-%D9%84%D9%88-%D8%A5%D9%86%D8%AA%D8%A7-%D8%A3%D8%B5%D8%BA/

الكاتب :
جهاد اللبودي

12 نصيحة للمستجدين في شغل السوشيال ميديا

لو كل ما تفتح موقع توظيف تلاقى مطلوب وظيفة مسوق الكترونى على السوشيال ميديا وانت مش لاقى شغل ، أو قاعد ليل نهار على الفيس بوك ونفسك تبقى السوشيال ميديا شغلك، أحب اقولك الموضوع مش صعب ومش سهل، ممكن السوشيال ميديا تبقى شغلتك، بس قبل ما تشتغل أو حتى تتعلم تشتغل لازم فى شوية نصايح وأفكار تاخد بالك منهم الأول عشان تلاقى الدنيا بعد كده ماشيه معاك زى السكينه فى الحلاوة
1 – أخيراً هتشتغل فى السوشيال ميديا
إحنا بتوع like , share , comment هنقعد شويه على فيس بوك وشويه على تويتر وهناخد مرتب , دى كانت أول حاجة إتكتبت فى الكتاب العظيم “مذكرات مغفل”، حضرتك لما تشتغل فى السوشيال ميديا هتبقى قمة راحتك وسعادتك هى اللحظات الى هتقدر تبقى فيها أوف لاين ومش مجبر إنك تبقى قاعد على النت، إنسى فكرة إن الشغلانة دى مريحة، لو بتدور علي الراحة خدها من قصرها وإنفد بجلدك.
2- السوشيال ميديا مش شوية بوستات
مش شوية بوستات بتنزل على صفحة أو لينكات بتاخدها من موقع وتنشرها على صفحة، فى حاجة إسمها “RSS Feeds” ممكن تنشر كل حاجة أوتوماتيكك و أحسن منك، لا بتاخد فلوس ولا بتاخد أجازه.
اللى بيميزك ويخلى حد يدفعلك فلوس انك مسوق ولست ناشر، وإن الزبون عنده أهداف متطلبات بتعمل على تحقيقها وفق إستراتيجيه وخطة عمل.
3- الأكاونت الشخصي
لو إنت فاشل فى ادارة الأكاونت الشخصي الخاص بيك إبعد عن المجال ده خالص، مش هتنفع فيه، نجاحك فى التسويق بيبتدي من قدرتك على التسويق لنفسك، علشان كده بحاول أدير الاكاونت الشخصي بتاعي دلوقتي، مش هيبقى باب النجار مخلع .
4- التفاعل داخل الصفحه أو الحساب
مش دايما هو معيار النجاح، الأهم توصل لأهدافك التسويقية، يعنى لو إنت بتسوق لمنتج غالى جداً مستهدف فئة معينة ولنفترض فئة الاثرياء، ودخل عندك فى الصفحة 10 الآف من متوسطي الدخل وعملوا تفاعل عالي جداً على الصفحة لكن محدش إشترى خالص إنت كده فشلت فى إنك تحقق أهدافك، بالرغم إن الصفحة شكلها بيقول إنك ناجح ومكسر الدنيا.
5- الدنيا لسه بخير
هتلاقى ناس كتير وصفحات كتير بتساعدك وبتنشر معلومات قيمه جداً خاصة في مجال التسويق والسوشيال ميديا، وتقعد تتعب نفسك وتفكر إيه المقابل وبيعملوا كده ليه، ياااااه الدنيا لسه فيها خير، آه لسه فيها خير طبعاً، بس هما بيسوقوا لنفسهم وبيبنوا لنفسهم براند فى المجال وبيحاولوا يكبروا إسمهم زى ما أنا بعمل دلوقتى كده وده اللى بيقولوا عليه Inbound Marketing، إنك تقدم خدمات كتير بدون مقابل مادى لكن ليها عائد معنوي دلوقتي وبتتحول لعائد مادى فى المستقبل.
6- بتاع كله
متضيعش وقت فى فكرة المسمي الوظيفى ليك فى البداية، أحب أعرفك إنت بتاع كله، سوشيال ميديا اكيد، SEO ماشى، مدخل بينات مفيش مانع، كاتب محتوى ميضرش وممكن تعمل للناس اللى معاك فى المكتب شاى فى وقت فراغك، هيا آه مطحنه في البداية، بس هتستفاد جدا وتلم كمية خبرات ومعلومات متميزة هتساعدك فى المستقبل.
7- أيام سودا
بيقولوا بتوع طب يا عينى بيفضلوا طول عمرهم يذاكروا لان الطب كل يوم بيتغير انسف الفكره دى السوشيال ميديا والتسويق الالكترونى كل ربع ساعه تحديث لازم تفضل طول عمرك تذاكر علشان تفضل متميز وشاطر . ده انت هتشوف ايام سودا.
8- 50 % و 50%
السوشيال ميديا 50 % علم و50 % ابداع وفكر، إبداع من غير علم مش هتعرف تمتلك الادوات الى تساعدك على النجاح و علم من غير ابداع مش هتقدر تستخدم الادوات بشكل جيد يوصلك للنجاح.
9- تابع
لازم تتابع أكبر عدد ممكن من الصفحات، وتشوف الناس بتدير الصفحات إزاى، وإيه الأفكار الجديدة، والمنافسين بيشتغلوا إزاى، ومفيش مشكلة إنك تاخد فكرة وتعمل شئ شبيه بيها، الأهم إنك تستخدم الفكرة فى موضعها المناسب مش تقليد وخلاص، ده مش معناه إنك متفكرش أو إن فكرك كله يبقى جوه الصندوق، لو إنت تقدر تنسف الصندوق نفسه انسفه (نسف الصندوق دى واخدها من shereen_words#)، حاول تستفيد من أفكارك وأفكار الناس وألاهم تحقق أهدافك وتحل المشاكل الى هتواجهك.
10- إوعى تدوس enter، إوعى تدوس enter
لازم تنسى المفتاح ده خالص، لازم تراجع كل حرف بتكتبه مره وإتنين، لازم تقيم اللى هتنشره من كل النواحى قبل ما تدوس enter، لو مستهون بالموضوع أحب اعرف ان فى الكيبورد حرف “ص” جنب “ض”، لك ان تتخيل لو غلط وإنت بتكتب فى بوست كلمة “عرض خاص”، كل سنة وإنت طيب بمناسبة الحفلة اللى هتتعمل عليك فى اليوم ده.د
11- متعملش البحر طحينة
لما تتعلم وتبقى خلاص قادر تشتغل وجالك أول عميل، متعملش البحر طحينه لإنه بكل بساطه هيجبلك علب بلاستيك ويقولك إملاها طحينه، إوعده بأقل من اللى هتقدر تعمله لحد ما تاخد الخبرة، وإقبل مقابل أقل من اللى كنت متوقعه بس مش أقل قوى يعنى، لإن الأهم تشتغل كتير علشان تاخد خبرات أكبر وأغلى بكتير من المقابل اللى هتاخده وتقدر تحقق الأهداف اللى وعدت بيها.
12- إتّك عالصبر
مش بين يوم وليلة هتبقى مشهور ومحترف وكل الشركات والعملاء بيترموا عليك، بس أكيد لو فضلت مصمم على إنك تتعلم أكتر وتطور من نفسك دايماً، أكيد فى يوم هتوصل لمكانة كبيرة وخلى بالك مستحيل حد يعلمك كل شئ، عندك حاجتين ممكن تتعلم بيهم حاجات كتير أوى أولهم جوجل، دوَّر وإقرا، والحاجة التانية إيدك، جرب وإغلط وصلح لحد ما تعرف وطوَّر من نفسك وكده هتوصل هتوصل.

المصدر 
 http://www.feldigital.com/12-%D9%86%D8%B5%D9%8A%D8%AD%D8%A9-%D9%84%D9%84%D9%85%D8%B3%D8%AA%D8%AC%D8%AF%D9%8A%D9%86-%D9%81%D9%8A-%D8%B4%D8%BA%D9%84-%D8%A7%D9%84%D8%B3%D9%88%D8%B4%D9%8A%D8%A7%D9%84-%D9%85%D9%8A%D8%AF%D9%8A%D8%A7/

الكاتب :
محمد الجمال

اعرف فيس بوك Edgerank قبل ما تدير صفحتك

اوقات كتير بتقعد تسأل نفسك هوا ليه البوست اللي بتنزله على الصفحة مش بيوصل لكل الفانز عندك؟
الإحصائيات بتقول ان اي بوست بينزل عندك عالصفحة بيوصل لنسبة 6.51% بس من الفانز عندك ودا حسب اخر احصائية اتعملت في شهر مارس اللي فات مع انه كان في فبراير 2012 بيوصل لنسبة 16%.
المتحكم في الموضوع دا بقى هو عمنا الـ Edgerank، طيب اية هو بقى الـ Edgerank دا ؟
Edgerank:
هي عبارة عن حاجة عملها فيس بوك كمعيار لتقييم كل حاجة بتنشرها على صفحتك عشان تخضع إلى 3 قواعد: كم فان تفاعل مع البوست؟ نوع البوست؟ توقيت نشر البوست؟
1- AFFINITY SCORE:
عدد اللي تفاعلوا مع البوست بتاعك، بيحدد عدد الفانز اللي تفاعلوا مع البوست، وكل ما الفانز عملو لايك و كومنت وتاج وشير للبوست كل ما بقي أعلي، ودا بيخلي اللي إنت بتنشره يظهر للفانز اكتر عشان كدا حاول دايما تنزل بوستات و كونتنت يخلي الفانز تتفاعل معاه.
2- EDGE WEIGHT:
دا بقى يا سيدي بيحدد نوع البوست. يعني فيس بوك بيعتبر ان نشر صورة اهم من نشر لينك أو انك تكتب تيكست بوست بس ودا عشان الـ EW يهتم بنوع البوست.
3- TIME DAY:
دا بقى بيحدد الوقت اللي انت بتعمل فيه البوست، ودا طبعا مهم جدا عشان تخلي البوست بتاعك يوصل لاكبر عدد من الفانز، يعني مثلا انك تعمل بوست لموضوع الساعة واحدة الصبح مش زي ما تعمل بوست لموضوع الساعة 10 بليل، وبرده انت لو علمت بوست لحاجة على الصفحة عندك وبعدها على طول نزلت بوست تاني هنا فيس بوك هيهتم بأخر بوست انت نشرته ودا هيبقى على حساب البوست اللي قبله ودا طبعا هيأثر على التفاعل بين البوستات.
يعني تتلزم بالـ EdgeRank تبقي صاحبي وحبيبي وكفاءة … متتلزمش … فيس بوك هيعصرك ينزل منك فانز صغيرين.

المصدر 
 http://www.feldigital.com/%D8%A5%D8%B9%D8%B1%D9%81-%D9%81%D9%8A%D8%B3-%D8%A8%D9%88%D9%83-edgerank-%D9%82%D8%A8%D9%84-%D9%85%D8%A7-%D8%AA%D8%AF%D9%8A%D8%B1-%D8%B5%D9%81%D8%AD%D8%AA%D9%83/
الكاتب : أحمد عبد السلام