أ ب سوشيال ميديا

في الفترة الأخيرة ناس كتير بدأت تعرف اهمية سوشيال ميديا في التسويق الالكتروني، و حاليا اغلب البراندات في الدنيا بقت بتعتبر سوشيال ميديا جزء من واجهة التسويق بتاعتها، ودا خلى ناس كتير تهتم بإنها تتعلم المجال دا و حابه تعرف مبادئ عنه، والسؤال اللي دايما الناس بتقوله : لو عايز أتعلم سوشيال ميديا اعمل ايه ؟

فانا حاولت الخص 3 سنين شغل في ال16 نقطة دول:

1- اختار النتورك المناسبة:

في كتير من الشبكات الاجتماعية اللي ممكن تستخدمها، لازم تختار منها اللي بتناسب المكان اللي انت فيه زي مثلا الخليج لازم تهتم بتويتر، مصر لازم تهتم بالفيس بوك ويفضل انك متستخدمش اكتر من 5 شبكات اجتماعية.

2- استخدم ادوات التحليل الخاصة بالسوشيال ميديا:

في كتير من الادوات اللي ممكن تستخدمها في تحليل الشبكات الاجتماعية اللي إنت شغال عليها وهي نوعين: في اللي بيوفرهالك الموقع نفسه، وفي ابلكيشن بتكون دورها هو تحليل ادائك على الشبكات دي لارقام زي مثلا في : Hootsuite, TweetDeck, Buffer.

3- اهتم بوقت البوستات:

انت لازم تكون عارف افضل وقت بيكون موجود عليه الفانز اللي عندك على صفحات التواصل الاجتماعي ودي تقدر تعرفها عن طريق ال Insights الخاص بالصفحة.

4- اعمل علاقة مع الجمهور:

انك دايما ترد على كل الكومنتات او الرسايل في اسرع وقت وانك تبني مع الفانز بتاعتك علاقات كويسة لإن سوشيال ميديا وسيلة للتفاعل مع الفانز مش مجرد مكان بتحط عليه محتوي.

5- استخدم الصور كثير:

حاول دايما تستخدم الصور و الفيديوهات كتير لان اغلب الوقت الفانز بتحب الصور اكتر من بوستات الكلام.

6- قدم حاجة مميزة:

حاول دايما تعمل تخفيضات او هدايا او جوايز.

7- اهتم بالجودة:

حاول دايما تهتم بجودة البوستات اللي بتقوم بنشرها مش تهتم بعددها وخليك دايما فاكر المقولة دي كويس جدا “Content is the KING”.

8- بلاش تستخدمها كأنها حسابك الشخصى:

مش معنى انه عندك 1000 صديق على الاكونت الشخصي بتاعك وبيعجبهم اللي انت بتكتبه يبقى بالضرورة انه يعجب الفانز اللي عندك على البراند لان ادارة الصفحات تختلف عن الاكونت الشخصي بتاعك.

9- اتعلم ازاي تسيب الشغل بشكل كويس:

لو انت لقيت نفسك هتفشل في ادارة اكونت معين ومش عارف تكمل فيه كويس حاول ان انت تنهي الشغل دا بشكل احترافي من غير ما تخسر العميل.

10- متسيبش الفانز تخبط راسها في الحيط:

حاول دايما تحل مشاكل الفانز اللي عندك بشكل محترف ومن غير ما تسئ لحد او تمسح كومنتات حتى لو كانت من اشخاص بيتصيدوا ليك الغلط.

11- بلاش تستخدم سوشيال ميديا كمكان بيع:

سوشيال ميديا دي مكان مش عشان تبيع فيه لكن دا مكان بتعرف الناس على المنتج بتاعك وبتحاول تحببهم فيه وعلى الاساس دا هم بيقرروا انهم يشتروا منك او لأ.

12- نسق تصميمات صفحتك:

حاول دايما انك تعملك شكل خاص بيك الناس تقدر انه تميزك بيه عن غيرك.

13- خطط للسوشيال ميديا بأهداف واضحة:

عشان خطة سوشيال ميديا جزء من خطة العمل الكبيرة بتاعة البراند يبقى لازم تحطلها اهداف واضحة و ثابتة وتكون مرتبطة بوقت.

14- خلي الفانز ملهوفين للمحتوى اللى بتنشره:

فكر بنفس عقلية الفانز اللي عندك على سوشيال ميديا ونزل بوستات تخليهم متشوقين انهم يتابعوك بشكل مستمر.

15- خلي محتواك سهل للنشر على سوشيال ميديا:

خلي دايما المحتوى بتاعك على الويب سايت سهل انه يتعمله شير على سوشيال ميديا.

16- اهتم بالقواعد اللغوية:

حاول دايما تاخد بالك من الاخطاء الاملائية لانها بتكون قاتلة في اوقات كتير.

عندك نصيحة تانية تحب تضيفها للناس اللي بتشق طريقها في سوشيال ميديا؟ إكتبها في الكومنتات.

المصدر : 

http://www.feldigital.com/%D8%A3-%D8%A8-%D8%B3%D9%88%D8%B4%D9%8A%D8%A7%D9%84-%D9%85%D9%8A%D8%AF%D9%8A%D8%A7/

الكاتب : أحمد عبد السلام